Чӑваш чӗлхин икчӗлхеллӗ ҫӳпҫи

Текст: Пс 103

Пай: Библи –> Псалтирь

Автор: Библи

Ҫӑлкуҫ: Раҫҫей Библи пӗрлӗхӗ. Библи. — Санкт-Петербург.:2009. 1567 с.

Хушнӑ: 2016.04.16 21:59

Пуплевӗш: 28; Сӑмах: 394

Текст тӗсӗ: Тӗн

Вырӑсла Тема: Тӗн

[Давид псаломӗ, тӗнчене пултарни ҫинчен.]

1. Эй чунӑм, Ҫӳлхуҫана мухта!
эй Ҫӳлхуҫа, эй Туррӑм!
Эсӗ тӗлӗнмелле аслӑ,
Эсӗ мухтавлӑхпа аслӑлӑх тӑхӑннӑ;
2. Эсӗ риза вырӑнне ҫутӑ тӑхӑнатӑн,
тӳпене чатӑр пек каратӑн;
3. ҫӳлти пӳлӗмӳсене шывсем ҫине туса лартатӑн,
пӗлӗтсене Хӑвӑн урапу тӑватӑн,
ҫил ҫуначӗсем ҫинче пыратӑн.

4. Эсӗ сывлӑшсене Хӑвӑн ангелусем тӑватӑн,
ялкӑшса ҫунакан вут-ҫулӑма Хӑвна ӗҫлесе тӑракансем тӑватӑн.

5. Эсӗ ҫӗре тӗреклӗ никӗс ҫине вырӑнаҫтарнӑ:
вӑл ӗмӗр-ӗмӗрне те хускалмӗ.

6. Тӗпсӗр шыв ӑна тумтирпе витнӗ пек витнӗ;
тусем ҫинче шывсем тӑраҫҫӗ;
7. Эсӗ хӑтӑрса илнипе вӗсем чупаҫҫӗ,
аслатийӳ сассине илтсе хӑвӑрт каяҫҫӗ;
8. тусем ҫине хӑпараҫҫӗ, айлӑмсене —
Эсӗ вӗсем валли палӑртнӑ тӗле — анаҫҫӗ.

9. Эсӗ чиккине кӑтартнӑ, вӗсем унтан иртес ҫук,
ҫӗре хуплама та каялла килес ҫук.

10. Эсӗ ҫӑлсене айлӑмсем тӑрӑх янӑ:
тусем хушшипе [шывсем] юхаҫҫӗ,
11. пур тӗрлӗ хир кайӑкне те шӑвараҫҫӗ;
хир ашакӗсем ӗҫсе ӑшне кантараҫҫӗ.

12. Вӗсен таврашӗнче вӗҫен кайӑксем пурӑнаҫҫӗ,
туратсем хушшинче чӗвӗлтетеҫҫӗ.

13. Эсӗ тусене ҫӳлтен шӑваратӑн,
Санӑн ӗҫӳсенӗн ырӑлӑхӗпе ҫӗр тӑранать.

14. Ҫӗртен ҫимӗҫ кӑлармашкӑн
Эсӗ выльӑх-чӗрлӗх валли курӑк ӳстеретӗн,
ӗҫ ӗҫлемешкӗн этем валли калча ҫитӗнтеретӗн,
15. этем чунне савӑнтаракан эрех,
унӑн сӑнне ҫутатакан йывӑҫ ҫӑвӗ,
этем чӗрине вӑй кӗртекен ҫӑкӑр пултаратӑн.

16. Ҫӳлхуҫа йывӑҫӗсем — Вӑл лартнӑ Ливан кедрӗсем —
шывран тӑранаҫҫӗ;
17. вӗсем ҫинче кайӑксем йӑва ҫавӑраҫҫӗ:
чӑрӑшсем ҫинче — аист йӑви,
18. ҫӳллӗ тусем ҫинче — ту качакисем;
чул хысаксем — мулкачсене пытанмашкӑн.

19. Уйӑха Вӑл вӑхӑт кӑтартмашкӑн пултарнӑ,
хӗвел те хӑй анӑҫне пӗлет.

20. Эсӗ сӗмлӗхе саратӑн та — каҫ пулать:
вӑл вӑхӑтра вӑрманти пӗтӗм тискер кайӑк ҫӳрет;
21. арӑслансем тупӑшшӑн ахӑраҫҫӗ,
хӑйсем валли Турӑран апат ыйтаҫҫӗ.

22. Хӗвел тухать те — вӗсем пуҫтарӑнса
шӑтӑкне кӗрсе выртаҫҫӗ;
23. этем хӑй ӗҫне тума тухать,
мӗн каҫченех хӑйӗн ӗҫӗпе аппаланать.

24. Эй Ҫӳлхуҫа, Санӑн ӗҫӳсем ытла та нумай-ҫке!

Эсӗ пурне те ӑслӑлӑхпа пултарнӑ;
ҫӗр Эсӗ мӗн пултарнипе тулнӑ.

25. Акӑ тинӗс — аслӑ та сарлака вӑл:
унта чӗрчунсем кӗшӗлтетеҫҫӗ,
вӗтти те, шултӑри те — имӗ-сумӗ те ҫук;
26. унта карапсем ишсе ҫӳреҫҫӗ,
унта — Эсӗ тинӗсре вылямашкӑн пултарнӑ ҫав левиафан та.

27. Пурте вӗсем Санран
кирлӗ вӑхӑтра апат парасса кӗтеҫҫӗ.

28. Паратӑн та — илеҫҫӗ,
аллуна уҫатӑн та — ырӑлӑхупа тӑранаҫҫӗ;
29. Хӑвӑн сӑнна кӑтартмастӑн та — аптӑраса ӳкеҫҫӗ,
сывлан сывлӑшне илетӗн те — вилеҫҫӗ,
каллех тӑпра пулаҫҫӗ;
30. Хӑвӑн сывлӑшна яратӑн та — чӗрӗлеҫҫӗ,
ҫапла Эсӗ ҫӗр питне ҫӗнететӗн.

31. Ҫӳлхуҫана ӗмӗрех мухтав пултӑр;
Ҫӳлхуҫа Хӑйӗн ӗҫӗсемшӗн савӑнтӑр!

32. Вӑл ҫӗр ҫине пӑхать те — ҫӗр чӗтренет;
тусене сӗртӗнет те — вӗсенчен тӗтӗм тухать.

33. Ӗмӗрӗм тӑршшӗпех Ҫӳлхуҫана мухтаса юрлам,
хам пурӑннӑ чухне Туррӑма кӗвӗ каласа мухтам.

34. Манӑн юррӑм Ӑна кӑмӑллӑ пулинччӗ;
вара эпӗ Унпа пӗрле савӑнӑп.

35. Ҫылӑхлӑ ҫынсем ҫӗр ҫинчен ҫухалччӑр,
йӗркесӗр ҫынсем малашне ан пулччӑр.

Эй чунӑм, Ҫӳлхуҫана мухта!

Аллилуия!

Мухтав:

Меню

 

Статистика

...тĕплӗнрех