Чӑваш чӗлхин икчӗлхеллӗ ҫӳпҫи

Текст: Арҫын телейӗ…

Автор: Лидия Филиппова

Ҫӑлкуҫ: https://chuvash.org/lib/haylav/7352.html

Хушнӑ: 2019.05.20 15:14

Пуплевӗш: 37; Сӑмах: 216

Текст тӗсӗ: Сӑвӑллӑ хайлав

Вырӑсла Тема: Паллӑ мар

(философиллӗ-юптаруллӑ ирӗклӗ сӑвӑ)

Кам вӑл – арҫын? Кам эсӗ – чӑваш арӗ?

Пӗлсех Чӑваш Юманӗпе танлаштараҫҫӗ-ши сана?

Ҫулсем вӗҫсе пыруҫӑн ӗмӗрлӗх кӗрлевӗ,
Иртни тата пуласлӑх пӑлхантараҫҫӗ-ши чунна?

Туссем, пуҫа ватар пӗрле: арҫын телейӗ…

Мӗнре вӑл? Мӗнех телей кӳме пултарӗ арҫынна?

Хӑҫан телейпеле ҫиҫет ун пичӗ-куҫӗ?

Хӑҫан вӑл хатӗр ҫавӑрмашкӑн тепӗр май Ҫӗр чӑмӑрне?

Пӗлеп, аслӑраххи-ӑслӑраххи, ак, калӗ:
-Арҫын телейӗ – вӑрҫӑ ҫуккинче.
Ҫак тӑнӑҫ пурнӑҫра
Вӑрҫӑ кӗрлевӗ мар, ача-пӑча шӑв-шавӗ
Тата юратнӑ мӑшӑр хуҫаланччӑр сирӗн ҫуртӑрта…

Мӗнре е, тен, камра чӑн-чӑн арҫын телейӗ?

Хӑҫан халь-халь сиксе тухассӑн тапать унӑн чӗри?

Укҫа? Футбол? Сӑра? Карьера? Тутлӑ шашлӑк?..

Тен, ҫӗн машина туянсан? Тӗслӗрен, «Феррари Энцо»?..

Теле-е-ей… Куҫ умӗнче вара — Чӑваш Юманӗ…

Чунра – аваллӑхран, йӑх-тымартан тапса тӑран хӑват.

Арҫын, тен, ывӑнмасӑр тырӑ актӑр, утӑ
ҫултӑр, вутӑ ҫуртӑр?
Килес ӑру валли ҫул хывтӑр?..

Арҫынсенче, паллах, курас килет хӑюлӑх.
Инкек-синкек килсе тухсан е, тен, усал-тӗсел ерсен
(Паллах, ан пултӑр ун пекки) кам лӑплантарӗ?

Камӑн тӗреклӗ ҫурӑмӗ хыҫне пытанӑпӑр, хӗрсем?

Арҫын тенин телейӗ — унӑн вӑйӗнче тен?

Тавлашӑва чарма, кирлех тӑк — «ҫук» теме пултарнинче?

Е, тен, килсе тухсассӑн пурнӑҫ пӑтӑрмахӗ
Пулас ҫӗнӗ ӑрушӑн пурӑнма вӑй-хал ҫитернинче?..

* * *

…Пӗтӗмлетсе вара, ентешӗмсем, ҫапла калам:
Арҫын телейлӗ хӑй кирлине туйсан, алли-ури ӗҫ
Таврашне пырсан.
Ҫурта ҫути ытамӗнче
Куҫран-куҫа пӑхса унта йӑхсен малашлӑхне курсан.

Эппин, пӗрлех пурнар, упрар тус-тӑвана,
Темле пулсан та… — арҫынсӑр йывӑр, тупата.

Улӑпсене вара, кӗрнек Юмансене —
Чӑваш тӗнчин пуласлӑхне — ҫитӗнтерер пӗрле.

Меню

 

Статистика

...тĕплӗнрех